إنسان بطعم الخذلان للشاعر ملاك بولس انسان بطعم الخذلان يا شايل هم بكرا شايله ليه وهو لسه مجاش خليك ف الحاضر وانسي ماضي اتعاش ولا تفكر ف ...
إنسان بطعم الخذلان للشاعر ملاك بولس
انسان بطعم الخذلان
يا شايل هم بكرا شايله ليه وهو لسه مجاش
خليك ف الحاضر وانسي ماضي اتعاش
ولا تفكر ف اللي وعدك زمان ومبقاش
ولا تشتري اللي باعك وبيعه لو ببلاش
اللي كسب كرامته مهما خسر كسبان
واللي عايش يرضي الكل هيعيش ندمان
وفر تفسيرك لناس مطلعه العيبه فيك
وبيع كل الناس متبقيش غير اللي شاريك
لان الاحسن ليك متدقش طعم الخذلان
هو عشان انسان وطيب
يجرحوا فيك بالساهل
اهو درس وعدي
ودور علي ناس تستاهل
مدرسة الدنيا ملهاش اعمال سنه
وانا للاسف كنت عيل جاهل
مهما اتشتمت ف الضهر بتجاهل
دور علي ناس تستاهل
ناس شبهك حلوه و بسيطه
يوم ما تقع تلقي
نفسك مسنوده علي حيطه
كتير ناس بالكوم لكن منظر
وبلاش تستنظر حد يسأل مالك
سرير الوحده هيحاوطك
ولا حدش هيخبط علي بابك
الاكتئاب كل يوم هيزيد
وهتعرف صحبك ف الشده
وتنسي ان بينكم مواعيد
فتبدل حضن صحبك بالمخده
هيمر عليك ليل الشتاء بارد
تتزكر فيه اجمل ايام
تسرح ويكون زهنك شارد
وتقول والله بعودة الايام
و سلام
لحب طفوله ما دامش
علمني ازاي متعشمش
سلام للصحبه والجيره
وكلام ف الضهر ما حصلش
فبلاش تتعلق بحب مش دايم
ولا تمسك في ايد ناس سابت
وامسح قاموس العشم
اصل العشم حبال و دابت
كنت طفل صغير وجميل
معرفش معني الحزن
عاشرت كل البشر
ندمت و زادت الاحزان
وبدل م كنت جميل
بقيت انسان بطعم الخذلان
ملاك - بولس
ليست هناك تعليقات