لــحـظـات لحظات من عمرنا بتعدي ونلاقي الساقيه تدور بينا ولحظات الدنيا تفرحنا وساعات الدنيا تبكينا ونعيش أغراب في الدنيا بفراقنا لناس ...
لــحـظـات
لحظات من عمرنا بتعدي
ونلاقي الساقيه تدور بينا
ولحظات الدنيا تفرحنا
وساعات الدنيا تبكينا
ونعيش أغراب في الدنيا
بفراقنا لناس غاليه علينا
ونعيش مع ناس مش عايزينهم
ونفارق أعز مالينا
وساعات غريب يفرحنا
واقرب مالينا يبكينا
ونقابل في حياتنا وشوش
فاكرينهم لو مهما نسينا
ونقابل برضو وشوش تانيه
ننساهم وهم وسطينا
عايشين في الدنيا عرايس
بتوزع أدوارها علينا
والكل بيلعب غير دوره
ونقول للدنيا احنا رضينا
صدق اللي قال رضينا بالهم
والهم عمره ما رضي بينا
الصادق تاه وسط الخاين
واولاد الهرمه علوا علينا
وناس غدرها في العين باين
وبرضو بيضحكوا علينا
بنحاول نمشي في سكتنا
والدنيا تصعبها علينا
عايزانا نمشي على طوعها
ونقول كلامك ماشي علينا
كذا مره نقول احنا وافقنا
ولا مره انتي وافقتينا
دا حتى في أبسط أحلامنا
نلاقيكي يا دنيا عاندتينا
مع أن أحلامنا بسيطه
لا شاليه ولا قصر ولا مدينه
أحلامنا نعيش في افراحنا
وما تكونش أيامنا حزينه
وتعيش جوانا البسمه
ونغني أجمل أغانينا
ونرجع من تاني حبايب
و ننسى كل ما قاسينا
أرجوكي يا دنيا كفايه جراح
وبلاش يا دنيا ترازي فينا
خلاص ما عدناش نتحمل
من غدرك احنا اكتفينا
وعيشينا مره في فرح
دا من جراحك ملينا
ماتصفي لينا يادنيا في يوم
وارسي بينا على مينا
وبلاش تصحينا وسط الحلم
ونفتح للصبح عنينا
ونلاقي نفسنا عشنا في فيلم
لحظاته سرقت أمانينا
وخرجينا قوام م الهم
وابنيلنا م الفرح سفينة
الله عليك يا شريف جميله القصيد والله
ردحذف